ኢትዮጵያ ከ87 በላይ የጥበቃ ቦታዎች ባለቤት ሆናለች

ኢትዮጵያ ባለፉት 60 ዓመታት ባደረገችው እንቅስቃሴ ከ87 በላይ የጥበቃ ቦታዎች ባለቤት መሆኗን የኢትዮጵያ የዱር እንስሳት ጥበቃ ባለሥልጣን ገለጸ፡፡

ባለሥልጣኑ ‹‹60 ዓመታት ለኢትዮጵያ የዱር ሕይወት›› በሚል መሪ ሐሳብ በዓሉን በማክበር ላይ ይገኛል።

የባለሥልጣኑ ዋና ዳይሬክተር ኩመራ ዋቅጅራ በወቅቱ እንዳሉት፤ ተቋሙ ባለፉት ዓመታት ባከናወናቸው ተግባራት በተፈጥሮ ጥበቃ መስክ ስኬት አስመዝግቧል፡፡

የዱር ሕይወት ጥበቃ ላይ የተሳተፉ ሬንጀሮችና የየአካባቢዎቹ ማህበረሰብ ያበረከቱት አስተዋፅኦ ከፍተኛ መሆኑንም ገልጸዋል፡፡

የቱሪዝም ሚኒስትር ዴኤታ ስለሺ በቀለ በበኩላቸው የኢትዮጵያ ብርቅዬ እንስሳት የብሔራዊ ማንነታችን አካል ናቸው  በማለት ተናግረዋል፡፡

ባለፉት ዓመታት በተሰሩ ሥራዎች ኢትዮጵያ በተፈጥሮ ሀብት ብዝኃነት ከአፍሪካ ቀዳሚ ሆናለች ሲሉም አክለዋል።

ሕገ ወጥ አደን፣ ሕገ ወጥ የዱር እንስሳት ንግድ፣ የዓለም የአየር ንብረት ለውጥና የፋይናንስ  ቀውስ ለዘርፉ ተግዳሮቶች መሆናቸውን ሚኒስትር ዴኤታው አብራርተዋል፡፡

ተግዳሮቶችን መፍታት የአንድ ጊዜ ሥራ ብቻ ሳይሆን፤ ሂደት የሚፈልግ መሆኑን አመላክተው፣ለዚህም ሁሉም ባለድርሻዎች በትብብር እንዲሰሩ ጥሪ አቅርበዋል።

ኢትዮጵያ  የበርካታ ብርቅና ድንቅ የዱር እንስሳት ባለቤት ስትሆን፤በርካታ ብሔራዊ ፓርኮች እንዳሏት መረጃዎች ያመለክታሉ፡፡